Result 4D

Bello! Bilang itu minions. Kesian ini belog sudah lama tidak ditulis cerita-cerita baru. Pemalas bha si Akemi sejak kuat berjalan ini. Saya ingat mau mula rancak tulis belog sudah start semester 4 Selasa ini. Yeehuu kembali ke sekolah, anak-anak terpilih!

Baiklah. Sebelum secara rasminya (aiseh) menulis belog dengan rancak semula, saya di sini mau tunjuk-tunjuk (show-off) result 4D. Result numbur ekur! Nda bha, bukan result numbur yang mau ditayang. Saya taulah bha saya ni kaki numbur, tapi nda pandai mangana numbur yang saya tikam.

Result semester 3 baru juga keluar. Saya terkejut jugalah bila nampak ini kali (short semester) punya result. Mimang saya sudah agak, result semua cantik-cantik habis short semester sikit seja bha subjek. Walaupun geng koguts saya temberang result kampung-kampung, tapi saya tau result durang lawa-lawa semua habis diam-diam seja durang (happy kan?).

Result 4D!

Saya tidak menjangkakan ini kepala 4, ekur kusung-kusung. Tapi kenapa hati saya rasa lain bila dapat ini result ah? Bukan saya nda thankful tapi lain bha rasa dia bila dapat kepala 4. Saya biasa dapat 3.5 ke atas tapi kurang dari 4 (lebih puas dan happy bila dapat result begini). Bila dapat kepala 4, saya rasa macam tidak terasa challenge ataupun dugaan dia. Saya rasa macam kerja atau usaha yang saya bikin tidak worth kepala 4. Sebab, sepatutnya kepala 4 ini susah untuk dapat tapi kenapa saya rasa macam senang seja dapat ini kali (saya rasalah).

Itulah ada quote tu bilang, perjalanan itu lebih penting dari destinasi yang ingin dituju. Perjalanan bagi saya itu kerja dan usaha sayalah, destinasi itu ibarat result lah. Bila saya dapat itu result kepala 4, saya rasa tidak puas. Mungkin bagi orang lain dapat kepala 4 sudah lebih dari puas hati. Mungkin semester depan mereka merasa "punya senang dapat kepala 4, rilek-rilek lah kita next sem dapat juga kepala 4."

Walaupun saya gila, kuat jalan, koguts, setiap minggu pigi karaoke, balik tengah-tengah malam, rocking sampai lupa diri, tapi saya dapat balance juga dengan belajar, assignment, presentation, datang kelas walaupun rupa macam hantu. Begini baru puas rasa dia. Koguts + Awesome = Kogutsome!

Macam dalam Sepuloh Nama pula, dia bilang "Ada gila yang tersembunyi". Jadi, sebagai konklusi kalau mau koguts tiada masalah tapi mesti mau balance sama belajar barulah awesome. Saya tidak sabar mau masuk sekolah Selasa ini! Semester 4 tunggu saya! Muak muak muak, para tu~